وفاقی وزیر برائے منصوبہ بندی احسن اقبال کا کہنا ہے کہ عمران خان پاکستان میں انتشار کی سیاست پیدا کر کے دشمنوں کا کھیل کھیل رہا ہے۔

لاہور میں پریس کانفرنس کرتے ہوئے احسن اقبال نے کہا کہ ممنوعہ فنڈنگ کے ذریعے ملک میں انتشار پیدا کیا جا رہا ہے، کچھ قوتیں چاہتی ہیں عمران خان کے ہاتھوں پاکستان کو دیوالیہ کیا جائے، یہ ملک میں انتشار کی سیاست پیدا کر کے دشمنوں کا کھیل کھیل رہا ہے۔

انہوں نے کہا کہ عمران دور میں مخالفین کو بدترین انتقام کا نشانہ بنایا گیا، عمران نیازی انتخابی عمل میں مداخلت کرکے ڈھٹائی کے ساتھ تمام ضابطے پیروں تلے روندھ رہے ہیں۔

وفاقی وزیر کا مزید کہنا تھا کہ الیکشن کمیشن فارن فنڈنگ کیس کا فیصلہ نہیں سنا رہا، معلوم نہیں عمران خان کو فارن فنڈنگ کی اجازت کس نے دی تھی، یہ عوام کو گمراہ کر رہے ہیں۔

لیگی رہنما نے کہا کہ عمران نیازی نے ملک کی خارجہ پالیسی کا بیڑا غرق کیا، انہوں نے چار سال میں پاکستان کو بند گلی میں کھڑا کردیا ہے جب کہ ہم پاکستان کو واپس بند گلی سے باہر نکال رہے ہیں۔