لاہور کے علاقے بینک اسٹاپ کے قریب بارش کے باعث مکان کی دیوار گرگئی، جس کے نتیجے میں ملبے تلے دب کر 5افراد جاں بحق ہوگئے۔

لاہور میں تیز بارش نے تباہی مچادی، بینک اسٹاپ کے قریب مکان کی دیوار گرنے سے میاں بیوی اور 3بچے جاں بحق اور ایک زخمی ہوگیا جبکہ امدادی ٹیموں نے لاشوں اور زخمیوں کو اسپتال منتقل کردیا۔

لاہور میں تیز بارش، مکان کی دیوار گرگئی، 5 افراد جاں بحق#AajNews #AajUpdates pic.twitter.com/9YYFEAkoRH

— Aaj News (@Aaj_Urdu) June 17, 2022

مرنے والوں میں 52 سالہ شبیر، 45 سالہ مسرت، 19 سالہ شرجیل، 16 سالہ آمنہ اور 14سالہ نوفیل شامل ہیں۔

ادھر پنجاب کے مختلف شہروں میں بھی وقفے وقفے سے بارش کا سلسلہ جاری ہے، جہلم میں تیز ہوا کے ساتھ بارش کے باعث متعدد علاقوں میں بجلی کے فیڈر ٹرپ کرگئے، سڑکوں پر پانی جمع ہوگیا۔

ننکانہ صاحب میں نشیبی علاقے زیر آب آگئے، حویلی لکھا میں آندھی کے باعث ٹرانسفارمر میں آگ لگ گئی، آگ نے متعدد مکان اور دکانوں کو لپیٹ میں لے لیا۔

اس کے علاوہ شرقپورشریف میں تیزبارش سے بجلی کی فراہمی معطل ہوگئی۔