وزیراعظم عمران خان نے بلوچستان سے متعلق اجلاسوں میں وفاقی اداروں کے اعلیٰ افسران کے شرکت نہ کرنے پربرہمی کا اظہار کیا ہے۔

وزیراعظم ڈیلیوری یونٹ نے تمام متعلقہ اعلیٰ افسران کو مراسلہ جاری کردیا اور ہدایت کی کہ عوامی فلاح سے متعلق اجلاس میں شرکت نہ کرنے پرسخت کارروائی کی جائے گی۔

گورنر بلوچستان نے وزیراعظم عمران خان کو بلوچستان میں وفاقی اداروں کی سہ ماہی کارکردگی رپورٹ ارسال کی۔

گورنر نے اجلاسوں میں وفاقی اداروں کے افسران کے شرکت نہ کرنے کی شکایت کی۔رپورٹ میں بتایا گیا ہے کہ صوبہ بلوچستان میں 17 وفاقی اداروں کے افسران کےڈیش بورڈز کا جائزہ لیا گیا۔

بلوچستان میں وفاقی اداروں کو11 ہزار سے زائد شکایات موصول ہوئیں۔90 فیصد کو حل کیا گیا۔عوام کی جانب سے 37 فیصد اطمینان کا اظہار کیا گیا۔