وزیر اعظم عمران خان نے ڈسکہ انتخابات کے الیکشن کمیشن کے فیصلے کو لاہور ہائی کورٹ میں چیلنج کرنے اور انتظامی افسران کے خلاف اٹھائے جانے والے اقدامات کو بھی لاہور ہائی کورٹ میں چیلنج کرنے کی منظوری دے دی۔

این اے 75 ڈسکہ، جس پر دھاندلی کا خدشہ تھا، جب الیکشن کمیشن نے دوبارہ انتخاب کا فیصلہ کیا تو ن لیگ کا چیلنج قبول کرنے والی جماعت الیکشن کمیشن کے فیصلے کو ہی چیلنج کرنے لگی۔

وزیراعظم نے این اے 75 پر الیکشن کمیشن کے فیصلوں کو لاہور ہائیکورٹ میں چیلنج کرنے کیلئے قانونی لائحہ عمل کی منظوری دے دی۔

لاہور میں وزیراعظم سے فردوس عاشق اعوان، بیرسٹر سیف اور این اے 75 کے امیدوار علی اسجد ملہی نے ملاقات کی۔

بریفنگ میں کپتان کو بتایا گیا کہ الیکشن کمیشن کو اس نوعیت کی کارروائی کا اختیار نہیں، تحریک انصاف لاہور ہائیکورٹ میں دو پٹیشنز دائر کرے گی۔

ایک پٹیشن میں الیکشن کمیشن کے دوبارہ انتخاب کو چیلنج کیا جائے گا، جبکہ دوسری پٹیشن میں انتظامی افسران کے خلاف کارروائی کے فیصلے کو چیلنج کیا جائے گا۔